за 500 денари поскапе престојот во градинка во Струга
Наместо да се реши проблемот со 21 негувателка и воспитувачка кои со години работат со договор на дело за само 10.000 денари, во градинката во Струга повторно продолжи праксата за привремени договори. Алсат дознава дека ангажираните повторно добиле договори на дело наместо вработување. Овој пат, според раководството на градинката, причина за тоа било следново:
„Имајки го во предвид фактот дека ни престојат парламентарни и претседателски изборни процеси, сите барања за добивање на согласности за вработување во сите институции се ставени во мирување“, вели Сања Колеска Србоска, Директорка на градинката.
Според информации на Алсат, една ангажирана веќе ја напуштила градинката и си заминала на работа во градинката во Вевчани. Од синдикатот алармираат дека ќе останат без кадар.
„Апелираме до општината и до надлежните министерства брзо да се реши проблемот бидејќи навистина има потреба од решавање на работниот статус на времено вработените колешки. Тоа не е решение, но во нашата општина години наназад е така. Без тој кадар ние не може да работиме во иднина“, изјави Милка Долинска, Синдикат во градинката.
Инаку, државниот трудов инспекторат во февруари ѝ издаде опомена на градинката да престане со праксата привремено да ангажира лица. И беше наложено да спроведе постапка со кое лицата ќе се вработуваат согласно Законот за вработени во јавниот сектор.
но, додека овој проблем не се решава, локалните власти во Струга за 500 денари ја зголемија цената за престој во градинка. Сега родителите на повеќе од 250 деца, наместо по 1.500 денари, ќе плаќаат по 2.000 денари. Ваквата одлука доби зелено светло од мнозинството во советот на општината на ДУИ и СДСМ, па реагираа од опозицијата.
„Општината треба да биде општествено одговорна и да ги намали своите непродуктивни трошења, а со цел да ја намали разликата во цена и да му помогне на секој родител…“, изјави Елисавета Кочоска Вељамоска, Советничка од ВМРО-ДПМНЕ.
Образложението на градинката е дека услугата морало да поскапи поради зголемените цени на прехранбените производи. Инаку, самите родители, иако плаќаат месечен надоместок, секој месец од свои средства во градинката носат сапун, тоалетна и кујнска хартија, како и средства за дезинфекција.
Мики Трајковски